Lace amerous breide

Tollemache Transcription [53]

Lace amerous breide if þu wylt mak an hol lace of ii colour tak 4 red bowis & set on A B C D lefte & 4 whyght on A B C D ryght & if þu wyl þe bow B ryght may be departyd with blake & whyght þan xal þi felaws ryght a cord to þi lyfte hand & <equal?> þan reuerse al ȝour bowis þan xal þu tak with A ryght þorow B C D ryght & D C B lyfte þe bow of A lyfte reuersyd þan hie þi lyfte bowis þan xal D lefte tak þe bow of D ryght onreuersyd þen low þi ryght bowis so þat þe bow þat was takyn of A lyfte go ouer þe ouer bow & dwel styl on A ryght & þe bow þat was with in on A ryght be do on B ryght þan xal þi felaw do in þis sam maner as þu dydyst þan chong þe ouer bowis of owr next handes & þe ouer bowis of owr farþer handes & be gyn a geyne now þu xalt vndyrstond be as it is forseyd þan xal þe lace be wrethyn from þe on end to þe oþer & if þi felaw work with hys lyfte hand as þu dydyst with þi ryght þan xal þe lace be fayer & euyn & if ȝow work with owr next handes tyl þe bowis be ageyn as þei war at þe begynnyng & þan work with þe farþer handes as ȝe dyd with owr next handes tyl þe bowis b<e> a geyn as þei war at þe begynnyng þen xal þi lace be most fayer in amerus breid & in þis maner chang ȝowr warkyng